Annwyl drigolion,

Gobeithiwn eich bod yn iawn a diolch am eich amynedd a'ch cydweithrediad parhaus.

Efallai eich bod wedi sylwi ar welliannau dros yr wythnos ddiwethaf o ganlyniad i'r mesurau parcio ychwanegol rydym wedi'u rhoi ar waith. Mae'r camau gweithredu hyn wedi'u rhoi ar waith i fynd i'r afael â phryderon a fynegwyd ac er mwyn ceisio tarfu cyn lleied â phosibl ar y gymuned leol.

Mae'r mesurau allweddol sydd bellach mewn grym yn cynnwys:

• Parcio Dynodedig Oddi ar y Safle: Rydym wedi trefnu parcio oddi ar y safle, wedi'i gaffael gan Sacyr, ac rydym yn gweithredu gwasanaeth bws gwennol i gludo gweithredwyr y gadwyn gyflenwi i'r safle ac oddi yno.
• Patrolau Parcio: Mae patrolau rheolaidd yn cael eu cynnal mewn ardaloedd preswyl cyfagos i fonitro ac i annog pobl i beidio â pharcio’n amhriodol. Bydd hysbysiadau’n cael eu rhoi i unrhyw gerbydau a ddarganfyddir yn torri ein polisi parcio.
• Mynediad a Reolir gan Gerdyn Parcio: Mae uwch-reolwyr yr isgontractwyr wedi cael cardiau parcio i'w defnyddio ym maes parcio Ysbyty’r Eglwys Newydd. Mae mynediad i'r ardal hon bellach yn cael ei reoli'n llym.
• Cymhellion Teithio Gwyrdd: Mae cerbydau grŵp (sy'n cludo pump neu fwy o unigolion) yn cael eu hannog fel rhan o'n menter gynaliadwyedd, a chaniateir iddynt gael mynediad i'r maes parcio ar y safle ar ôl cofrestru.
• Cydweithio ag Awdurdodau Lleol: Rydym yn gweithio'n agos gyda Swyddogion Cymorth Cymunedol yr Heddlu lleol, sydd wrthi'n cefnogi ein hymdrechion trwy batrolau cymunedol. Hyd yn hyn, nid ydynt wedi nodi unrhyw gerbydau y bu'n rhaid iddynt eu gorfodi.

Rydym yn parhau wedi ymrwymo i fod yn gymydog da, a byddwn yn parhau i fonitro a mireinio ein dull gweithredu yn ôl yr angen. Rydym bob amser yn croesawu ac yn gwerthfawrogi eich adborth.

I ddathlu Diwrnod Canser y Byd, mae Canolfan Ganser Felindre yn cynnal Prynhawn Crefftau a fydd yn agored i holl aelodau'r cyhoedd, a bydd Sacyr UK, y contractwr sy'n adeiladu Canolfan Ganser Newydd Felindre, yno i roi help llaw.

Bydd gweithdy crefftau yn cael ei gynnal yn y ganolfan. Bydd y gweithdy'n canolbwyntio ar greu bathodynnau rhuban Diwrnod Canser y Byd i godi arian ar gyfer Gwasanaeth Canser Felindre, gan gefnogi ei ymdrechion i frwydro yn erbyn canser yng Nghymru.

Ymunwch â ni brynhawn Llun 2 Chwefror 2026, rhwng 2pm a 4pm yng Nghanolfan Ganser Felindre am sesiwn hwyliog i gefnogi achos da.

Dewch i helpu i wau, gwnïo, crefftio a chreu eitemau hardd gyda'n gilydd, ac i roi help llaw i greu rhywbeth gwirioneddol arbennig, gan godi arian ar yr un pryd.

Lledaenwch y neges – rydym yn edrych ymlaen at eich gweld chi yno!

New Velindre Cancer Centre - Summary Monitoring Report - January 2026

Watch last month's construction progress!

Bu i Sacyr UK, y contractwr sy'n adeiladu Canolfan Ganser newydd Felindre, dreulio amser yn gwirfoddoli mewn elusen yng Nghaerffili ym mis Rhagfyr, a hynny'n rhan o'i addewid i gefnogi elusennau lleol dros gyfnod y Nadolig.

Mae Prosiect ToyBox, sydd wedi'i leoli yng Nghaerffili, yn un o'r elusennau y mae Sacyr UK yn ei chefnogi, ac mae'n darparu teganau newydd ac ail-law am ddim i blant o deuluoedd sy'n profi caledi ariannol.

Ymunodd aelodau o Dîm Buddion Cymunedol Sacyr UK, Jo O'keefe, Hannah Jenkins, Sam Rees, a Katie Hathaway, â chyd-weithwyr eraill Sacyr UK sy'n gweithio ar brosiect Canolfan Ganser newydd Felindre, gan gynnwys y Cydlynydd Logisteg Damian Talis, y Rheolwr Masnachol Anthony Robson, y Pensaer a'r Swyddog Technegol ar y Safle Adriana Lizeth Ramírez Hernández, yr arbenigwr Rheoli Prosiectau Andrea Toledo, a'r Pennaeth Caffael Javier Jorba Coloma, i gwrdd â Rheolwr Prosiect ToyBox, Donna Pearce O'Halloran, a groesawodd y tîm a'r cyfle i gael y gwirfoddolwyr i helpu gyda'r gweithgarwch cynyddol yn ystod tymor yr ŵyl.

Roedd tîm Sacyr UK yn canolbwyntio ar ddidoli a threfnu'r teganau i'w rhoi ar silffoedd i baratoi ar gyfer eu dosbarthu i deuluoedd mewn angen – aethant ati hefyd i brofi teganau i nodi unrhyw fatris diffygiol a sicrhau eu bod yn ddiogel.

Parhaodd y rhoddion i lifo i mewn trwy gydol y dydd, a bu'r tîm yn rheoli'r llwythi o deganau a ddaeth trwy'r drws. Bu'r tîm yn didoli dros dri bin o deganau ac yn ail-stocio llawr y siop i greu lle ar gyfer rhoddion newydd. Ar ben hyn, trefnodd isgontractwyr Sacyr, SGM Waste Management, bod cerbyd casglu sbwriel yn gwaredu teganau a oedd wedi torri neu'n ddiwerth, ac nad oedd modd eu casglu. 

Yn dilyn llwyddiant y diwrnod, ysbrydolwyd Cydlynydd Datblygu'r Gweithlu CBT, Hannah Jenkins, i wirfoddoli'n annibynnol i helpu'r Prosiect ToyBox ymhellach gyda'i ymdrechion cyflawni.

Cyd-weithwyr Sacyr UK ac Iwerddon Jo O’keefe, Hannah Jenkins, Sam Rees, Katie Hathaway, Damian Talis, Anthony Robson, Adriana Lizeth Ramírez Hernández, Andrea Toledo, a Javier Jorba Coloma, ynghyd â Donna Pearce O’Halloran o Brosiect ToyBox.

Mae Canolfan Ganser newydd Felindre wedi croesawu pedwar aelod newydd i fwrdd Llysgenhadon Acorn. 

Mae'r cynllun Llysgenhadon Acorn wedi bod ar waith ers i'r prosiect dorri tir, ac mae'n rhoi cymorth a chyngor ar gynllun budd cymunedol arfaethedig a phresennol y prosiect. Mae'n cyfathrebu newyddion i breswylwyr lleol ac yn mynychu digwyddiadau cymunedol i feithrin ymwybyddiaeth o werthoedd cymdeithasol y prosiect. Mae ei aelodau hefyd yn eiriol dros y prosiect i'r gymuned leol. 

Mae pedwar aelod newydd o'r bwrdd bellach wedi cael eu recriwtio i'r cynllun, gan gryfhau ymhellach y cysylltiadau rhwng prosiect Canolfan Ganser newydd Felindre a chymunedau ac elusennau ledled Caerdydd a'r rhanbarth lleol. 

Mae Lindsay Doyle, dyn busnes lleol a chodwr arian ar gyfer elusennau, wedi cael ei recriwtio i'r bwrdd. Mae'n dod â phrofiad helaeth o'r sector ariannol, yn ogystal ag o faes codi arian, ac mae'n gymeriad adnabyddus ym myd busnes Caerdydd. 

Mae'r cerddor a'r fyfyrwraig leol, Meg Uppington, sy'n beiriannydd technegol gyda Diff Radio, hefyd wedi cael ei phenodi i'r bwrdd. Mae'n cynnig gwybodaeth werthfawr am ddiwylliant ieuenctid lleol a thueddiadau sy'n dod i'r amlwg. 

Mae aelod arall o dîm Diff Radio, Matt Cutrupi, hefyd wedi cael ei benodi. Matt yw rheolwr Diff Radio. Yn ogystal â rhedeg ei fusnesau ei hun, mae ganddo wybodaeth helaeth am ymgysylltu â'r cyfryngau cymdeithasol, cysylltiadau ieuenctid, a thueddiadau diwylliannol, sy'n golygu ei fod yn ychwanegiad defnyddiol iawn i'r bwrdd. 

Mae Cyfarwyddwr Asiantaeth Farchnata Edie & Ludlow, Alexandra Otley, sydd hefyd yn godwr arian ar gyfer Felindre, wedi ymuno â'r bwrdd yn ogystal. Roedd hanes blaenorol cadarn Alex o godi arian, yn arbennig ar gyfer y ganolfan ganser, ynghyd â'i sgiliau o ran marchnata byd-eang a strategaeth ddigidol, yn golygu ei bod yn ymgeisydd amlwg. 

Mae bwrdd Llysgenhadon Acorn yn cael ei gadeirio gan Reolwr Buddion Cymunedol Sacyr UK, Katie Hathaway, a'i gefnogi gan aelodau o Dîm Buddion Cymunedol Canolfan Ganser newydd Felindre. 

Mae ceisiadau am aelodau newydd o'r bwrdd yn dal i fod yn agored, a dylai partïon sydd â diddordeb wneud cais trwy'r ddolen ganlynol i Microsoft forms: 
Ffurflen Gais Llysgenhadon Acorn – llenwi'r ffurflen

Watch last month's construction progress!

New Velindre Cancer Centre - Summary Monitoring Report - December 2025

New Velindre Cancer Centre - Newsletter 7

Roedd yn bleser gan Ymddiriedolaeth GIG Prifysgol Felindre groesawu Prif Swyddog Meddygol Cymru am ymweliad a roddodd olwg gynhwysfawr ar y gwaith eang sydd yn cael ei wneud ar draws yr Ymddiriedolaeth, a'r cynnydd sydd yn cael ei wneud ar y Ganolfan Ganser Felindre newydd. 

Penodwyd yr Athro Isabel Oliver yn Brif Swyddog Meddygol Cymru ym mis Ebrill 2025 ac yn ei rôl, mae hi’n darparu arweinyddiaeth glinigol a chyngor proffesiynol annibynnol i Lywodraeth Cymru ynghylch materion iechyd ac iechyd y cyhoedd. 

Roedd ymweliad yr Athro Oliver yn gyfle hefyd i arddangos maint safle newydd Canolfan Ganser Felindre, yr uchelgais glinigol y tu ôl i'r prosiect, a'r manteision y bydd y ganolfan newydd yn eu cynnig i gleifion, teuluoedd a staff. 

Yn ystod yr ymweliad, clywodd yr Athro Oliver gan nifer o gydweithwyr ar draws yr Ymddiriedolaeth a oedd yn tynnu sylw at ein blaenoriaethau sefydliadol, yn trafod y cefndir o ran datblygu’r Ganolfan Ganser Felindre newydd, rôl ac effaith Gwasanaeth Gwaed Cymru, ein dull o arwain yn y maes meddygol, a chryfderau cynyddol ein portffolio ymchwil a datblygu.  

Dywedodd Prif Weithredwr Dros Dro Ymddiriedolaeth GIG Prifysgol Felindre, Carl James: “Roedd yn fraint croesawu’r Prif Swyddog Meddygol a rhoi darlun llawn o waith yr Ymddiriedolaeth - o rôl genedlaethol hanfodol Gwasanaeth Gwaed Cymru i’r cynlluniau trawsnewidiol ar gyfer ein Canolfan Ganser Felindre newydd o’r radd flaenaf. Tynnodd yr ymweliad sylw at yr angerdd, yr arbenigedd a'r penderfyniad sydd yn cael eu darganfod ar draws ein timau, a'r ymrwymiad a rennir ar draws GIG Cymru i ddarparu'r gofal o'r ansawdd uchaf a'r canlyniadau gorau i'n cleifion a'n rhoddwyr.

Cafodd y Prif Swyddog Meddygol daith o amgylch safle’r Ganolfan Ganser Felindre newydd, lle cafodd weld y cynnydd sydd yn cael ei wneud o lygaid y ffynnon, a chwrdd ag aelodau o dîm y prosiect sy’n arwain y gwaith o’i ddatblygu. 

Meddai’r Athro Isabel Oliver, Prif Swyddog Meddygol Cymru: “Roeddwn i wrth fy modd yn ymweld â safle’r Ganolfan Ganser newydd, a gweld y cynnydd sydd yn cael ei wneud. Fe wnaeth uchelgais y tîm i wella canlyniadau iechyd i bobl Cymru a gwneud Cymru yn arweinydd byd ym maes triniaeth canser greu argraff fawr arnaf, ac rwy'n edrych ymlaen at weithio gyda nhw i wireddu hyn.”

Dangosodd yr ymweliad raddfa'r adeilad, y weledigaeth glinigol sy'n llunio dyfodol gofal canser i ddarparu gofal gwell i gleifion, a'r nodweddion cynaliadwy sydd wedi cael eu dylunio, gyda chleifion a staff wrth wraidd y gwaith.

Meddai Dr Jacinta Abraham, Cyfarwyddwr Meddygol Gweithredol, Ymddiriedolaeth GIG Prifysgol Felindre: “Roedd yr ymweliad yn foment bwysig i ddangos yr uchelgais glinigol sy’n sail i bopeth rydym yn ei wneud ar draws yr Ymddiriedolaeth.” O ymchwil ac arloesedd i arwain yn y maes meddygol a dylunio ein Canolfan Ganser Felindre newydd, ein ffocws ydy gwella canlyniadau a chreu gofal o'r ansawdd uchaf i bobl ar draws Cymru. Roedd yn bleser gennym rannu’r weledigaeth honno gyda’r Prif Swyddog Meddygol.” 

Tanlinellodd yr ymweliad ymdrech barhaus Felindre i ddarparu gwasanaethau o'r radd flaenaf i bobl Cymru, a'r cynnydd rydym yn ei wneud tuag at agor Canolfan Ganser Felindre newydd yn nhymor y Gwanwyn 2027. 

Cynhaliodd Sacyr UK, y prif gontractwr sy'n adeiladu Canolfan Ganser Newydd Felindre, fore coffi ar gyfer ei dîm budd cymunedol a'r is-gontractwyr sy'n helpu i adeiladu'r ganolfan. Yn ystod y bore coffi, trafodwyd ymrwymiad Sacyr i werth cymdeithasol a'r effaith gadarnhaol y bydd y prosiect yn ei chael ar y gymuned.

Roedd cynrychiolwyr yn bresennol o blith chwe is-gontractwr sy'n gweithio ar y prosiect, gan gynnwys Nelco Radiation Shielding, Mac Scaffolding, Pacegrade, Falcon 3, a'r arbenigwyr awyru, Zitron.

Yn arwain y trafodaethau yr oedd Rheolwr Ymgysylltu â Rhanddeiliaid a Buddion Cymunedol Sacyr UK, Katie Hathaway, y Cydlynydd Buddion Cymunedol, Jo O'Keefe, a Chydlynydd Datblygu'r Gweithlu, Hannah Jenkins.

Yn rhan o'r bore, bu Sacyr UK a'i is-gontractwyr yn trafod y modd y gallant gefnogi amcanion gwerth cymdeithasol y prosiect yn fwy effeithiol a chreu syniadau newydd i helpu ac ymgysylltu â'r gymuned leol.

Dywedodd Cydlynydd Datblygu'r Gweithlu ar gyfer Sacyr UK, Hannah Jenkins: “Rydym yn deall pwysigrwydd gwerth cymdeithasol ac am wneud gwahaniaeth ystyrlon y tu hwnt i’r gwaith yr ydym yn ei gyflawni.

“Yma yn Sacyr UK, rydym wedi ymrwymo i gefnogi mentrau sy’n cryfhau’r gymuned leol, a hynny trwy greu cyfleoedd i sicrhau effaith gadarnhaol ein prosiect. Hoffem ddiolch i'r is-gontractwyr a oedd yn bresennol yn y bore coffi ac a gyfrannodd mewn modd cadarnhaol at y drafodaeth ynghylch sut y gallwn wasanaethu'r gymuned leol yn well.”

Yn ddiweddar, roedd aelodau o dîm Datblygu Cymunedol a Datblygu'r Gweithle Sacyr UK yn ffair swyddi Dydd Mawrth Porffor yng Nghanolfan Dewi Sant yng nghanol dinas Caerdydd, lle roeddent yn annog a chefnogi pobl ag anableddau i ddychwelyd i'r gwaith.

Wedi ymuno â Hannah Jenkins a Katie Hathaway o Sacyr UK yn y ffair oedd Dan Biddle, Prif Weithredwr y Gwasanaeth Cyflogaeth a Chynghori Cenedlaethol ar gyfer Amrywiaeth, a threuliasant y prynhawn yn ymgysylltu â siopwyr, gan eu cyflwyno i'r cyfleoedd gyrfaol sydd ar gael yn y diwydiant adeiladu, a helpu pobl sy'n cael trafferth dod o hyd i waith.

Rheolwr adeiladu oedd Dan Biddle ar ddechrau ei yrfa, cyn iddo gael ei anafu'n ddifrifol yn ymosodiadau terfysgol Llundain yn 2005. Treuliodd flwyddyn yn yr ysbyty cyn iddo allu ailadeiladu ei fywyd, ailhyfforddi i fod yn ymgynghorydd mynediad, ac ennill ei statws ar Gofrestr Genedlaethol yr Ymgynghorwyr Mynediad (NRAC) yn 2007. Mae bellach yn gweithio'n ddiflino i sicrhau mynediad at gyfleoedd gyrfaol i bobl ag anableddau, a hynny trwy ei gwmni, Nationwide Access Consultants.

Mae Sacyr UK, y contractwr sy'n adeiladu'r ganolfan newydd, Canolfan Ganser Felindre (nVCC), yn bwriadu lansio menter trwy ei Academi Cyflogaeth Mynediad i'r Anabl  (Disability Access Employment Academy), a hynny mewn partneriaeth â'r Gwasanaeth Cyflogaeth a Chynghori Cenedlaethol ar gyfer Amrywiaeth, er mwyn helpu a chefnogi pobl anabl i gael cyflogaeth ystyrlon, yn ogystal â darparu amgylchedd cynhwysol iddynt.

Dywedodd Katie Hathaway, y Rheolwr Ymgysylltu â Rhanddeiliaid a Buddion Cymunedol yn Sacyr UK: “Mae’n bwysig helpu’r bobl hynny sydd ag anableddau, a chreu llwybr yn ôl i’r gwaith iddynt allu adfer eu hyder a sicrhau nad yw eu cyfleoedd yn cael eu cyfyngu gan amgylchiadau.

“Roedd ffair swyddi Dydd Mawrth Porffor wedi rhoi dealltwriaeth ddyfnach i ni o'r modd y gallwn gynorthwyo pobl anabl i gael gwaith, elfen a fydd yn helpu i ddarparu sefydlogrwydd ariannol iddynt. Rydym yn edrych ymlaen at bartneru â Nationwide Access Consultants i ymgysylltu â'r bobl hyn yn y gymuned a chreu cyfleoedd ar eu cyfer.”

Mae Sacyr UK, y contractwr sy'n adeiladu Canolfan Ganser Newydd Felindre, wedi dathlu cam diweddaraf y gwaith adeiladu gyda seremoni gosod y garreg gopa.

Nodwyd y seremoni trwy osod sbrigyn o binwydd ar bwynt uchaf yr adeilad – arwydd symbolaidd a thraddodiad adeiladu sy'n cydnabod gwaith caled ac ymroddiad pawb sy'n rhan o'r broses.

Ymunodd yr Aelod Senedd lleol Julie Morgan AS, Cyfarwyddwr Gweithrediadau Sacyr ar gyfer y DU, Iwerddon a Gogledd Ewrop, Alejandro Mendoza Monfort, ynghyd â David Powell, Cyfarwyddwr Prosiect Prifysgol Felindre, a Carl James, Prif Weithredwr Dros Dro Ymddiriedolaeth GIG Felindre, a chynghorwyr lleol a chynrychiolwyr Llywodraeth Cymru ag aelodau tîm prosiect Sacyr UK i ddathlu'r garreg filltir hollbwysig hon yn y prosiect.

Cafodd y rhai a oedd yn bresennol hefyd anerchiad arbennig gan arwr rygbi Cymru, Jonathan ‘Jiffy’ Davies, a oedd yn bresennol i gydnabod ei waith helaeth gyda Chanolfan Ganser bresennol Felindre.

Yn dilyn y seremoni, gwahoddwyd y gwesteion a'r tîm adeiladu i fwynhau cinio mochyn rhost am ddim a ddarparwyd gan Sacyr UK, yn ogystal â phicau ar y man a bobwyd gan Gydlynydd Datblygu Gweithlu y Tîm Buddion Cymunedol, Hannah Jenkins.

Dywedodd Alejandro Mendoza Monfort, Cyfarwyddwr Gweithrediadau Sacyr ar gyfer y DU, Iwerddon a Gogledd Ewrop: “Roedd yn wych bod cynifer o bobl wedi ymuno â ni ar gyfer seremoni gosod y garreg gopa ac i ddathlu’r garreg filltir hon yng ngham adeiladu Canolfan Ganser Newydd Felindre.

“Roedd yn ddigwyddiad arbennig cael dod ynghyd i werthfawrogi a dathlu pa mor bell y mae’r prosiect wedi dod. Mae'n wirioneddol anhygoel gweld pob dim yn dod at ei gilydd, ac roedd yn wych gweld cynifer o bobl yn bresennol i nodi'r garreg filltir gyda ni.”

Wrth i'r prosiect symud i'r cam adeiladu nesaf, bydd mwy o'r gwaith gosod mewnol yn dechrau, ochr yn ochr â pharatoi'r adeilad ar gyfer ei gomisiynu cyn iddo gael ei agor yng ngwanwyn 2027.

Hoffai Sacyr UK ac Iwerddon fynegi diolch enfawr i’w gyflenwyr sy'n cefnogi'r ymdrechion rhoi yn ystod tymor yr ŵyl eleni.

Gall y Nadolig fod yn gyfnod ynysig, yn enwedig i'r rhai sy'n brwydro yn erbyn tlodi, a diffyg modd i fyw a chymorth cymdeithasol. Yn y DU yn unig, mae bron dwy filiwn o blant yn wynebu amddifadedd materol, ac mae'r Nadolig yn gyfnod arbennig o galed. Dyna pam y mae Sacyr UK ac Iwerddon wedi gwneud ymdrech arbennig mewn cydweithrediad â'i is-gontractwyr hael i roi rhywbeth yn ôl i'r rhai nad oes ganddynt fawr ddim.

Mae dros 120 o flychau siocledi a chalendrau Adfent wedi cael eu cyfrannu ar gyfer y rhai mewn angen, a byddant yn cael eu rhoi i YMCA Caerdydd, ynghyd â'r Elusen Canser Plant, Latch, a'r hosbis plant lleol, Tŷ Hafan. Mae'r eitemau bach hyn yn gwneud gwahaniaeth mawr i deuluoedd sy'n brwydro yn ystod cyfnod arbennig o anodd.

Hoffai Sacyr ddiolch i'w gyflenwyr: Boss Security, Keyline Civils Specialist, Cardiff Rugby Supplies, ITS Recruitment, Robert Price a Speedy Hire am eu rhoddion caredig a hael –a dymuno Nadolig Llawen iawn iddynt.

Bydd safle adeiladu newydd y Ganolfan Ganser Felindre newydd yng Nghaerdydd ar gau dros gyfnod y Nadolig, o ddydd Mercher 24 Rhagfyr 2025 tan ddydd Sul 4 Ionawr 2026.

Bydd y gweithgareddau adeiladu arferol yn ailddechrau ar ddydd Llun, 5 Ionawr 2026.

                                          
Pwyntiau allweddol ar gyfer y cyfnod hwn: 
•    Bydd yr holl waith adeiladu yn gorffen erbyn dydd Mawrth 23 Rhagfyr.
•    Mae mesurau diogelwch ar y safle yn cynnwys diogelu offer, deunyddiau, peiriannau, sgaffaldiau a gwaith dros dro.
•    Bydd diogelwch yn cael ei gynnal drwy gydol y cyfnod cau.
•    Mae protocolau brys yn parhau ar waith.

Ar ran Tîm y Prosiect, hoffem ddymuno Nadolig Llawen iawn a blwyddyn newydd dda i chi gyd.

Rhoddwyd cyfle i dros 100 o fyfyrwyr o Brifysgol Caerdydd archwilio safle prosiect Canolfan Ganser Newydd Felindre.

Roedd mwyafrif y myfyrwyr yn astudio peirianneg sifil, a chawsant eu cyfarch gan y Cydlynydd Buddion Cymunedol, Joanne O’Keefe, a rannodd gyflwyniad ar y prosiect, gan ddangos dyluniad cryno y ganolfan, ynghyd â gwybodaeth am ei nodweddion gwyrdd.

Dilynwyd hyn gan daith gerdded i roi cyfle i’r myfyrwyr weld y broses adeiladu a meithrin dealltwriaeth ddyfnach o natur gymhleth datblygu seilwaith. Ar y daith, cafodd y myfyrwyr eu cyfarch gan Reolwr Prosiect Sacyr UK, Hugo Pou, a esboniodd ddatblygiad y prosiect.

Yn ddiweddarach, cafodd grwpiau anerchiad gan Elena Castro Blanco, sef Cyfarwyddwr Adeiladu Sacyr ar gyfer y consortiwm sy’n gyfrifol am ddatblygu Canolfan Ganser Newydd Felindre. Aeth ati i esbonio pwysigrwydd gwarchod a gwella’r ardal naturiol oddi amgylch, ac ymdrechion Sacyr i gynnal ei phrydferthwch naturiol.

O ddylunio i weithredu, mae Canolfan Ganser Newydd Felindre yn arwain y ffordd o ran gofal iechyd cynaliadwy. Hwn yw’r ysbyty cwbl drydanol cyntaf yn y DU, mae’n defnyddio ynni adnewyddadwy, ac mae wedi cael ei ddylunio i leihau'r effaith ar yr amgylchedd gymaint â phosibl wrth ddarparu’r gofal canser o safon fyd-eang y mae Felindre yn adnabyddus amdano.

Clywodd y myfyrwyr gan y Cynghorydd Iechyd a Diogelwch, Joshua Kincaid hefyd, a rannodd straeon am ei brofiad yn y maes a’r rheoliadau sy’n cadw’r byd adeiladu yn amgylchedd diogel i bawb sy’n rhan ohono.

Wrth sôn am yr ymweliad, dywedodd y Cydlynydd Buddion Cymunedol yn Sacyr UK, Jo O’Keefe: “Mae’n wych gweld cynifer o wynebau newydd, ffres, yn barod i fynd i’r afael â her y diwydiant adeiladu. Rydym yn hapus i allu eu helpu i ddelweddu eu dyfodol.”

Gwisgodd aelodau tîm prosiect Canolfan Ganser Newydd Felindre eu menig popty a’u ffedogau y mis Hydref hwn i gymryd rhan yn eu Bore Coffi Macmillan eu hunain.

Cynhelir bore coffi blynyddol Macmillan UK bob blwyddyn, gyda’r elusen ganser yn gwahodd sefydliadau, grwpiau cymunedol a phobl i rannu paned o goffi a chacen, codi arian, a thrafod y modd y mae canser wedi effeithio arnyn nhw a’u hanwyliaid.

Mae canser yn achos sy’n agos iawn at galonnau nifer o bobl ac yn rhywbeth sydd hefyd wedi effeithio ar rai o aelodau’r tîm yn Sacyr UK. Cafwyd cyfraniad hael o amrywiaeth o gacennau gan staff y swyddfa, o deisennau brith i fara banana. Roedd yna amrywiaeth eang i ddewis o’u phlith, gyda’r mwyaf poblogaidd yn dod o bopty Cydlynydd Datblygu’r Gweithlu, Hannah Jenkins, a fu’n gweini ei phicau ar y maen cartref.

Daeth aelodau’r staff ynghyd i roi arian, cael paned o goffi, sgwrsio, a chael cyfle i fod yn agored ynghylch y modd y mae canser wedi effeithio ar eu bywydau.

Yn y pen draw, bu i’r gwerthiant cacennau ragori ar y targed, gan godi cyfanswm terfynol o dros £400, a oedd yn well o lawer na’r swm disgwyliedig o £250.

Ymwelodd Dai Johns o Prostate Cymru â safle prosiect Canolfan Ganser Newydd Felindre i gynnal cyfres o sgyrsiau am sut i adnabod ac atal canser y prostad.

Cafodd Dai, sydd ’nawr yn 70, ddiagnosis o ganser y prostad pan oedd yn 56 oed, a hynny yn ystod treial clinigol y cymerodd ran ynddo am fod yna hanes o’r clefyd yn ei deulu. Roedd yn meddwl y byddai’n broses sgrinio syml; fodd bynnag, pan gafodd alwad ffôn gan feddyg yn dweud wrtho fod ganddo lefel uchel o antigen prostad-benodol (canlyniad prawf gwaed PSA), dywedwyd wrtho am fynd yn ôl i weld meddyg cyn gynted â phosibl.

Bythefnos yn ddiweddarach, gyda help cyfarpar llawfeddygol robotig, cafodd lawdriniaeth i dynnu’r canser, ac mae wedi bod yn gwbl rydd o’r clefyd am y 15 mlynedd ddiwethaf.

Mae Dai ’nawr yn teithio o amgylch Cymru ar ran yr elusen Prostate Cymru i gynnal sgyrsiau angerddol ac addysgol am ganser y prostad a’r arwyddion rhybudd cynnar i gadw golwg amdanynt.

Yng Nghymru yn unig, mae dros 2,500 o ddynion yn cael diagnosis o’r clefyd bob blwyddyn, gyda thua 1 o bob 8 dyn yn cael diagnosis yn ystod ei fywyd. Mae hyn yn cynyddu i 1 o bob 3 yn achos y rheiny sydd â hanes ohono yn y teulu. Hwn yw’r math mwyaf cyffredin o ganser ymhlith dynion, gyda dros 12,000 yn marw o’r clefyd bob blwyddyn.

“Mae mwyafrif y dynion nad ydynt yn marw o’r clefyd, yn marw gyda’r clefyd” meddai Dai pan ofynnwyd iddo am ragamcaniad o’r gyfradd ymhlith dynion 50 oed a hŷn sydd â chanser y prostad.

Dywedodd Dai ei fod wedi mwynhau sgwrsio â thîm Sacyr UK yn fawr: “Ar ôl darparu bron 500 o sesiynau, gallaf ddweud yn gwbl hyderus mai’r rhai hyn ar safle Canolfan Ganser Newydd Felindre oedd dwy o’r sesiynau gorau i mi eu cynnal.”

Gwahoddwyd dynion o bob rhan o’r safle i roi’r gorau i weithio, mwynhau ychydig o luniaeth, a ddarparwyd yn garedig gan Sphere Solutions, a gwrando ar Dai yn sôn am yr arwyddion i gadw golwg amdanynt.

I gael rhagor o wybodaeth am ganser y prostad, mae Prostate Cymru yn cynnig asesiadau iechyd rhad ac am ddim yma: https://www.prostatecymru.com/prostate-health-assessment/.

Os ydych yn gofidio am iechyd eich prostad, cysylltwch â’ch meddyg teulu neu ffoniwch linell gymorth rad ac am ddim Prostate Cancer UK ar 0800 7747560.

Bu Carlos Acuna a Vinchenzo Nigro, arweinwyr dylunio Sacyr UK ar gyfer Canolfan Ganser Newydd Felindre, allan ar strydoedd Caerdydd ym mis Hydref i redeg hanner marathon y ddinas a chodi arian y mae mawr ei angen ar gyfer yr elusen ddigartrefedd Llamau.

Ymunodd Carlos a Vinchenzo â 29,000 o redwyr eraill i gymryd rhan yn 22ain Hanner Marathon blynyddol Caerdydd, gyda nifer o’r rheiny hefyd yn codi arian ar gyfer eu helusennau dewisol.

Diolch i’w hymdrechion egnïol, cododd deuawd dylunio Sacyr UK swm anrhydeddus o £871 mewn arian nawdd ar gyfer Llamau.

Sefydlwyd Llamau yn 1986, ac mae’n darparu tai diogel â chymorth i arddegwyr digartref a menywod agored i niwed. Mae’r elusen, sydd wedi’i lleoli yng Nghaerdydd, wedi helpu dros 100,000 o bobl ifanc, menywod a phlant sy’n profi neu’n wynebu digartrefedd.

Mae’r arian a godwyd gan Carlos a Vinchenzo yn ddigon i ariannu hyd at naw noswaith o lety diogel â chymorth i bobl ifanc neu blant gan wasanaethau Llamau, neu bron 30 o sesiynau cwnsela mewnol i helpu pobl i brosesu trawma digartrefedd.

Pan ofynnwyd iddo am y profiad, dywedodd Vincenzo: “Hwn oedd fy hanner marathon cyntaf, ac roedd gweld y llinell derfyn wedi mynd â’m gwynt, yn llythrennol. Fydda i fyth yn anghofio’r cyfuniad hwnnw o orludded, balchder, a hapusrwydd.”

Hoffai Carlos a Vincenzo ddiolch i bawb a’u nododd, ac mae tîm Canolfan Ganser Newydd Felindre Sacyr UK hefyd yn ddiolchgar iddynt am eu gwaith caled a’u hymdrechion i godi arian ar gyfer yr elusen bwysig hon yng Nghaerdydd.

Aeth tîm Buddion Cymunedol Sacyr UK, y prif gontractwr sy’n adeiladu Canolfan Ganser Newydd Felindre, i ffair swyddi fwyaf Caerdydd ar Faes Criced Gerddi Soffia.

Ochr yn ochr â dros 80 o gyflogeion eraill, treuliodd y tîm y diwrnod yn gwneud cysylltiadau ac yn ymgysylltu â’r cyhoedd – gyda nifer o’r rheiny’n chwilio am gyngor a help o ran gyrfa.

Roedd Sacyr UK ymhlith 20 o gwmnïau adeiladu a oedd yn bresennol yn y ffair, yn ogystal ag is-gontractwyr a sefydliadau eraill yn y sector.

Bu i’r Tîm Buddion Cymunedol gwrdd ag amrywiaeth o bobl, o’r rheiny a oedd yn chwilio am gyflogaeth, i drigolion lleol a oedd yn awyddus i gael gwybod am y prosiect a’i gynnydd. Roedd y Ffair wedi caniatáu i aelodau’r tîm sgwrsio mewn ffordd fwy anffurfiol, gan roi amser iddynt ledaenu ymwybyddiaeth o brosiect Canolfan Ganser Newydd Felindre, yn ogystal â’r gobaith o ychwanegu cyflogeion newydd at dîm y prosiect.

Roedd is-gontractwyr Canolfan Ganser Newydd Felindre, NAB a Pirchard’s, hefyd yn bresennol, ynghyd â Blue Water Recruitment a Sphere Solutions.

Dywedodd y Cydlynydd Buddion Cymunedol, Joanne O’Keefe: “Mae Ffair I Mewn i Waith Caerdydd yn ffordd wych i ni estyn allan i’r gymuned, gan hefyd ein galluogi i dynnu sylw at yr hyn y mae Sacyr UK wedi’i gyflawni o ran y llwybrau gyrfa sydd ar gael.

“Roedd yn wych cwrdd â chynifer o bobl wahanol, rhai’n gyfarwydd a rhai’n newydd, a dweud wrthynt am y gwaith yr ydym yn ei wneud a’r cyfleoedd am swyddi sydd gennym, ac y gallai’r Ganolfan eu cynnig yn y dyfodol.”