Diweddariad ar bryderon ynghylch trefniadau parcio contractwyr Canolfan Ganser newydd Felindre

Roeddem am roi’r wybodaeth ddiweddaraf am y pryderon ynghylch contractwyr sy’n gweithio ar brosiect Canolfan Ganser newydd Felindre yn parcio mewn ardaloedd preswyl.  

Er bod mwyafrif helaeth y gweithlu yn parhau i ddefnyddio cyfleusterau parcio dynodedig a threfniadau teithio cymeradwy, mae tîm y prosiect yn cydnabod bod nifer fach o gerbydau yn parhau i barcio mewn ardaloedd preswyl cyfagos. Rydym yn deall y rhwystredigaeth y gall hyn ei hachosi i drigolion lleol ac rydym am sicrhau’r gymuned fod y mater hwn yn parhau i fod yn flaenoriaeth i dîm y prosiect. 

Mae ystod o fesurau lliniaru ar waith o hyd, gan gynnwys: 

• Cyfleusterau parcio pwrpasol y gweithlu ar gyfer personél y prosiect 
• Cyfathrebu a negeseuon atgoffa rheolaidd i’r gweithlu ynghylch disgwyliadau parcio 
• Monitro cerbydau y rhoddwyd gwybod amdanynt ac ymchwilio i bryderon a godwyd gan drigolion 
• Monitro gan aelodau o dîm y prosiect yn ystod amseroedd cyrraedd lle bo’n bosibl 
• Mae mesurau ychwanegol ar y gweill i wella’r broses olrhain cofrestru cerbydau a monitro cydymffurfedd y gweithlu 

Er bod Sacyr yn gallu ymchwilio i bryderon a gweithredu lle nodir bod cerbydau yn perthyn i’r gweithlu, pwysig yw nodi nad oes gan Sacyr unrhyw bwerau cyfreithiol i orfodi cyfyngiadau parcio ar y briffordd gyhoeddus. Nid yw parcio ar hyd strydoedd preswyl yn anghyfreithlon lle nad oes unrhyw gyfyngiadau parcio ar waith, ac mae’r cyfrifoldebau gorfodi yn perthyn i’r awdurdodau perthnasol. 

Ar ddydd Mercher, 30 Medi 2026, cyfarfu cynrychiolwyr o Sacyr UK a thîm prosiect Ymddiriedolaeth GIG Prifysgol Felindre â thrigolion i drafod trefniadau parcio’r gweithlu a’r mesurau sydd ar waith i helpu i leihau’r effeithiau ar gymunedau cyfagos.  

Yn ystod y cyfarfod, cafwyd cyflwyniad gan Reolwr Ymgysylltu â Rhanddeiliaid Sacyr a oedd yn amlinellu’r heriau sy’n gysylltiedig â threfniadau pharcio’r gweithlu ac yn egluro’n well i’r rhai a oedd yn bresennol y camau sy’n cael eu cymryd.   

Mae tîm y prosiect wedi ymrwymo o hyd i gydweithio â thrigolion, aelodau etholedig a rhanddeiliaid lleol i ddeall pryderon, ymchwilio i adroddiadau a nodi atebion ymarferol lle bynnag y bo modd. Hoffem ddiolch i bawb a ddaeth i’r cyfarfod ac a gyfrannodd at y drafodaeth. 

Cynhelir y cyfarfodydd galw heibio hyn ar ddydd Mercher olaf pob mis yn 19 Park Road rhwng 6pm a 7pm. Mae’r cyfarfodydd hyn yn gyfle i ofyn unrhyw gwestiynau sydd gennych i’r tîm a chael diweddariadau ar y prosiect.  

Gall trigolion barhau i roi gwybod am bryderon ynglŷn â pharcio yn syth i dîm Sacyr yn khathaway@sacyr.com.  

Bydd yr holl wybodaeth a geir yn destun adolygiad ac ymchwiliad lle bo’n bosibl. 

Rydym yn gwerthfawrogi cefnogaeth barhaus y gymuned leol wrth i waith adeiladu Canolfan Ganser newydd Felindre fynd rhagddo cyn agor yng ngwanwyn 2027.