Sacyr UK yn creu partneriaeth â Chyngor Caerdydd i lansio prosiect newydd i ddarparu cyfleoedd newydd i unigolion

Mae Sacyr UK, y contractwr sy'n adeiladu Canolfan Ganser newydd Felindre, wedi creu partneriaeth â Chyngor Caerdydd i lansio prosiect newydd i gefnogi unigolion sy'n awyddus i ailymuno â'r gweithlu trwy roi cyfleoedd cyn-gyflogaeth iddynt yn ogystal â phrofiad gwaith ymarferol.  

Roedd y bartneriaeth yn cynnwys adfywio cynhwysydd cludo, a elwir yr Hwb Adnoddau, a gafwyd o gyfleuster ailgylchu EMR Caerdydd yn benodol ar gyfer Canolfan Ganser newydd Felindre. Defnyddir y cynhwysydd bellach fel lle storio dros dro ar gyfer amrywiaeth o ddeunyddiau ailgylchadwy, gan gynnwys pren, pren haenog, cardbord, briciau, a chyfarpar diogelu personol, ac maent ar gael i'w casglu a'u defnyddio gan sefydliadau sydd wedi'u dilysu, gan sicrhau bod yr adnoddau gwerthfawr hyn yn cael eu rhannu a'u defnyddio'n ddoeth. 

Nid yn unig y mae'r fenter yn arddangos ymroddiad Sacyr UK i gefnogi sefydliadau cymdeithasol, gwirfoddol a chymunedol lleol trwy roi 100 o dunelli o ddeunyddiau, ond mae hefyd yn ceisio cefnogi unigolion a rhoi'r sgiliau a'r wybodaeth hanfodol y mae arnynt eu hangen ar gyfer cyfleoedd cyflogaeth yn y dyfodol.  

Cynigiodd y fenter gwrs pythefnos gan Academi Adeiladu Ar y Safle i chwe ymgeisydd. Roedd yn canolbwyntio ar sicrhau bod y cyfranogwyr yn ennill cymhwyster CSCS, a hynny wedi'i ddilyn gan wythnos yn canolbwyntio ar brofiad gwaith ymarferol, gan nodi eu potensial ar gyfer cyflogaeth yn y dyfodol gyda'r cwmni. Cafodd y chwe chyfranogwr a ddewiswyd – Hamza, Liam, Kailim, Sophie, Kieran, a Josh – eu cefnogi gan Dom, fforman sy'n gweithio ar y prosiect, a ddefnyddiodd yr ymarfer hwn fel rhan o’i asesiad NVQ ar oruchwylio safleoedd. 

Yn ystod y prosiect, cydweithiodd Sacyr UK â Kodie o Twf Swyddi Cymru+ PeoplePlus, a oedd y prif rym y tu ôl i ddyluniad y cynhwysydd a fydd yn cael ei ddefnyddio ar safle Canolfan Ganser newydd Felindre, gan greu dyluniad sydd nid yn unig yn effeithiol yn weledol ond sydd hefyd yn helpu i yrru newid cynaliadwy sy'n cyd-fynd â gwerthoedd Sacyr UK. Roedd Harlequin Print Ltd wrth law i gefnogi trwy roi'r byrddau dylunio a argraffwyd, a gafwyd yn rhannol diolch i Rygbi Caerdydd, gan ailgylchu deunyddiau a hyrwyddo'r economi gylchol ym mhob ffordd bosibl. 

Dywedodd EMR Recycling, a roddodd y cynhwysydd cludo: “Mae EMR yn rhannu ymrwymiad Sacyr i greu effaith gadarnhaol barhaol yn y cymunedau lle mae'n gweithredu, felly rydym yn falch iawn o gefnogi'r fenter 'I Mewn I Waith'. Mae rhoi'r cynhwysydd cludo yn sicrhau bywyd newydd iddo ac yn cefnogi'r gymuned leol trwy ein galluogi i ddarparu deunyddiau dros ben. Mae EMR hefyd yn gweithio gyda Sacyr i ailgylchu metelau diwedd oes y prosiect.”  

Dywedodd Hannah Jenkins, Cydlynydd Datblygu’r Gweithlu yn Sacyr UK: “Rydym yn llawn cyffro ynghylch y prosiect hwn. Nid yn unig yr ydym yn helpu i ddarparu gwaith i unigolion sydd wedi bod yn ddi-waith yn hirdymor neu nad ydynt mewn addysg, cyflogaeth na hyfforddiant, ond rydym hefyd yn lleihau gwastraff ac yn cefnogi ein cymunedau lleol mewn ffordd ystyrlon.”